Isasairarom sa full alert status an bilog na National Capital Region (NCR) puon sa Lunes kasabay kan pagpupuon kan impeachment trial ni Vice President Sara Duterte.
Segun ki National Capital Region Police Office (NCRPO) chief PMGen. Anthony Aberin na hali sa presenteng heightened alert status, liwat na itataas an antas kan kahandaan kan kapulisan makalihis an tulong aldaw na hiro protesta kan Iglesia ni Cristo (INC).
Sinabi man kan Philippine National Police (PNP) na nakahanda na an gabos na security preparations para sa impeachment trial kan bise presidente.
Maabot sa 6,000 pulis an idedeploy sa palibot kan Senado ngani na siertuhon an katrangkiluhan asin seguridad sa pagbubukas kan paglilitis.
Segun ki PNP Public Information Office chief PCol. Allen Rae Co, ipigsugo ni PNP chief PGen. Jose Melencio Nartatez Jr. sa gabos na mga pulis na magternir na disiplinado, warang pigkikilingan, asin nakatuon sa pagtatao nin serbisyo sa publiko.
Tinawan duon ni Nartatez na an pagtaas kan alert status an parte kan padagos na pagbabantay kan kapulisan sa sitwasyon ngani na masierto na bastante an mga lakdang sa seguridad mantang ipigrerespeto an diretsos kan mga namamanwaan.
