LEGAZPI CITY — Naisumitir na sa Prosecutor’s Office an kasong kakahampangon kan jeepney driver na imbwelto sa head-on collision sa sarong motorsiklo na ikinagadan kan driver sa Barangay Payawin, Gubat, Sorsogon.
Binawian nin buhay an motorcycle driver na si Rustico Estabaya, 38 na residente kan Barangay Cogon kan nasabing banwaan.
Sa intrevista kan Bombo Radyo Legazpi ki P/Maj. Jim Jeremias, hepe kan Gubat Municipal Police, kusa man na nagsuko an driver kan jeep na si Rosauro Espiel, 42 na residente kan Barangay Sta. Ana.
Base sa inisyal na imbestigasyon, pauli na si Estabaya na marikas an dalagan alagad kan makaabot sa pakurbadang parte kan national highway, na-slide ini asin naka-dead on collision an jeep na biyaheng Sorsogon City.
Huli sa direkta an impact, nagsapar nin mga lugad si Estabaya na tulos idinalagan sa ospital alagad idineklarang dead on arrival.
Segun ki Jeremias, warang lisensya an biktima, warang rehistro an motor asin wara pang sulot na helmet.
Mahahampang man sa kasong reckless imprudence resulting in homicide si Espiel na nasa kustodiya na kan hepatura.
