LEGAZPI CITY- Aminado an sarong political analyst na dakula an nagin pagkakaiba kan nakalihis na 2025 midterm elections sa iba pang mga pirilian sa nacion.
Ini makalihis na dakol na mga celebrities an dae uminubra an diskarte ngani na makuwa an buot kan mga botante.
Segun sa Political Analyst na si Atty. Michael Henry Yusingco sa intrevista kan Bombo Radyo Legazpi na garing may binuksan na bintana an mga millennials asin genz voters ngani na maski papano an magkaigwa nin pagbabago sa sistema kan politika.
Alagad dae nagpapaka kampante an opisyal na dagos na ining magigin dalan sa pagbabago huli ta sa presente namamayagpag man liwat suboot an mga political dynasty sa Senado asin Kongreso.
Para sa opisyal, dakol na mga undecided voters an naghihiling mismo kan track record kan mga kandidato na saindang pigpipili sa nakalihis na pirilian.
Mientras tanto, aminado man si Yusingco na maski papano magkakaigwa nin epekto an katatapos pa sanang pirilian sa 2028 presidential elections.
Paliwanag kaini na mapili si Presidente Ferdinand Marcos Jr. nin posibleng succesor asin kun mawot kaining magamit an kusog kan administrasyon kinakaipuhan na magprodusir nin resulta sa natatadang mga taon kan administrasyon.
Dapat na maipahiling sa publiko na igwang mga pagbabagong nangyari para sa mga namamanwaan sa irarom kan presenteng administrasyon.
