LEGAZPI CITY – Masasabi kan sarong peace studies professor na nagin matrayumpo an mga ralihista nganing ipamate an saindang pagkontra sa korapsyon sa mga ikinondusir na mahiwasang hiro protesta sa manlain-laing parte kan nacion.
Alagad segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na maski nagkasararo an publiko sa pagkondena kan korapsyon an magkaka-iba pa man liwat an saindang sentyemento na nagresulta dae pagkakawatak-watak kan saindang paghiro.
Saro suboot sa mga ini iyo an pagpangapodan kan mga pro-Duterte suppoorters na pagpapa-uli ki Former President Rodrigo Duterte.
Sa hiling niya man na posibleng mga criminal groups sana an mga sibilyan na gustong makihalo sa mga ralihista an nagkawsa kan kariribukan asin bako hale sa hinanakit kan mga tawo arug kan nangyari sa Indonesia.
Pigtaram pa kaini na pwedesir ipagpadagos an mga serye nin hiro protesta nganing ma-pressure an gobierno asin masibot sa pagsasagibo nin imbestigasyon nganing mapanimbag an mga tiwaling opisyal.
Masasabi niya man na makusog sa Pilipinas an mass movement asin enganyaron an pagboses kan mga agrangay sa matuninong na paagi asin likayan na mauli sa kadahasan an mga hiro protesta.
Ipig-omaw niya man an ginibong maximum tolerance kan mga kapulisan huli ta kun ano man an magigin kasimbagan ninda sa mga hiro kan publiko an pwedesir ining mauli sa kariribukan.
Pigdoon pa ni Rosana na dakulang tabang man an mga bistong personalidad na nakisumaro sa mga hiro protesta nganing maimpluwensyahan an publiko mapadapit sa mga nangyayari sa presenteng panahon.