LEGAZPI CITY- Padagos an pagtabang kan mga Balay Silangan sa Bicol region para sa reformation kan mga personang dati ng naimbwelto sa iligal na droga.
Segun ki Philippine Drug Enforcement Agency Bicol Director Edgar Jubay sa intrevista kan Bombo Radyo Legazpi na nakatutok an mga lokal na gobierno sa pagsuporta sa pangangaipo kan mga balay silangan sa tabang kan iba pang mga stakeholders.
Basado sa datos kan ahensya hasta kan Hunyo sa presenteng taon, igwa na nin nasa 121 graduates sa balay silangan sa provincia kan Albay mantang nasa 45 sa Camarines Sur asin 102 sa Camarines Norte.
Sa Sorsogon nasa 146 na an nakapagtapos sa balay silangan, nasa 31 sa Catanduanes asin 57 sa Masbate.
Katumbas ini nin nasa 502 graduates sa bilog na rehiyong Bicol.
Alagad sinabi ni Jubay na dae nagpupundo an monitoring kan mga otoridad asin nagpapadagos sa ipigsasagibong evaluation ngani na masiertong nasusustiner an pagbabagong buhay kan mga personang dating naimbwelto sa paggamit kan iligal na droga.
Mientras tanto, napag-araman na igwang mga kapartner an ahesya sa pagtatao nin skills training asin livelihood program sa ibang mga nakapagtapos sa balay silangan ngani na dae na magbalik an mga ini sa iligal na aktibidad.
