LEGAZPI CITY—Nakumpiskar kan mga otoridad an nasa P34,000 kantidad nin pigtutubudang shabu sa sarong dayong indibidwal sa Barangay Sugcad, Polangui Albay.
Binisto an suspek na siy alyas “Ronald,” 47-anyos, residente kan Iriga City asin kabale sa listahan bilang sarong Street Level Individual.
Matrayumpong nakabakal an sarong poseur-buyer nin sarong transparent plastic sachet na may laog nin pigtutubudang shabu karibay kan P4,500 na buy-bust money kabale an sarong tunay na P500 bill asin apat na pidasong boodle money.
Sa pagpapadagos kan operasyon, nakumpiskar pa saiya an kadugangan na pitong pidaso nin kaparehong substance. Sa kabilogan, pigkarkulong maabot sa 5 gramos an gabat kan nakumpiskar na droga na may estimated street value na P34,000.
Naarestar an suspek sa pinagsarong operatiba kan Polangui Municipal Police Station, Albay Police Provincial Office Provincial Intelligence Unit, 1st Albay Provincial Mobile Force Company, asin Philippine Drug Enforcement Agency Team-Albay.
Nasa kustodiya na kan mga otoridad an suspek asin mahahampang sa kasong pagbalgar sa Republic Act 9165 o ang Comprehensive Dangerous Drugs Act of 2002.
