LEGAZPI CITY—Nakauwi na sa kaniya-kaniyang bahay ang nasa 515 pamilya na lumikas mula sa Brgy. 27, Victory Village South, Legazpi City matapos ang pananalasa ng bagyong Opong.
Ayon kay Brgy. 27, Victory Village South Kapitana Basilia Capino, sa panayam ng Bombo Radyo Legazpi, ang mga evacuation center na ginamit ng kanilang mga residente ay ang St. Raphael the Archangel Parish, Victory Village Elementary School, Barangay Hall, gayundin ang matataas na bahay ng kanilang mga kaanak sa nasabing barangay.
Ayon sa opisyal, walang napinsala o may na-aksidente sa paghagupit ng bagyo.
Wala rin aniyang nagmatigas na ulong mga mangingisda na pumunta pang laot sa kasagsagan ng bagyo.
Dagdag pa niya, sa ngayon ay naghihintay sila ng tulong katulad ng relief goods mula sa lokal na pamahalaan ng Legazpi.
Samantala, pinaalalahanan din ni Capino ang mga residente ng Victory Village South na sundin ang mga awtoridad sakaling may sila ay pinapalikas lalo na sa mga ganitong kalamidad.
