LEGAZPI CITY – Obligado na an gabos na mga kaonan sa ciudad nin Legazpi na magtao nin libreng malinig na maiinom na tubig.
Sa intrevista kan Bombo Radyo Legazpi kay Councilor Alexander Jao, naaprobaran asin epektibo na an bagong ‘Free Potable Drinking Service Water Ordinance’.
Sa nasabing ordinansa, gabos na mga canteen, karinderya, restaurant asin iba pang pasilidad na nag-oopresir nin pagkaon an dapat na pirmeng may abilableng malinig na maiinom na tubig para sa mga kustomer.
An sisay man na magpapalyar na magsunod digdi an posibleng mapagmulta nin P3,000 para sa first offense asin P5,000 na may kasabay ng suspensyon kan business permit para sa second offense.
Obheto suboot kan ordinansa na matawanan nin dekalidad na customer service an mga residentes asin mga nagbibisita sa ciudad.
Sa mga may reklamo sa pasilidad na nagsusuway sa ordinansang ini, pwedeng magpasiring sa City Health office ngani na makapagsangat nin pormal na reklamo.
