LEGAZPI CITY – Nag-abot na sa ciudad nin Legazpi an mga delegado kan Masbate nganing irepresenta an provincia sa Palarong Bicol 2025 na mapoon na sa maabot na Dominggo, Marso 23.
Segun ki Masbate Schools Division Office Sports Division Officer Rufino Arellano sa intrevista kan Bombo Radyo Legazpi na kompwesto an mga delegado na nasa Legazpi na nin 481 na atleta, coaches, mga officials asin nakatalaang an labi 200 na delegado an magbyahe ngonian na aldaw.
Nagmamawot sinda na makakarepresenta an saindang mga atleta sa palarong pambansa.
Piglalaoman man ninda na magigin magayon an performance sa mga sporting events na pirmi sindang nanggagana sa mga nakalihis na palaro.
Pigtaram pa kan opisyal na malaban man an mga Masbateño athletes na ipiglalaban na man kan provincia sa mga national asin international sporting events.
Sa ibong kan kadakol na mga kadifisilang kinahampang kan saindang grupo, dae ini nagin hadlang sa saindang obheto na magin overall champion sa athletics asin iba pang kawat.
An mga napiling atleta na marepresenta kan provincia an nag-ensayo sa kaniya kaniya nindang mga eskwelahan sa paagi kan school based concentration training.
Nagmamawot man si Arellano na itatao gabos kan mga atleta kan bikol an saindang makakaya para sa ikakakusog kan pwersa kan rehiyon sa Palarong Pambansa asin tanggapon an resulta kan kawat nin may maray na pag-uugali.
