LEGAZPI CITY- Nadugangan pa an mga barangay sa Virac na nakakaeksperyensya ngunyan na nin kakulangan nin tubig huli sa El Niño.
Sa intrevista kan Bombo Radyo Legazpi kay Mayor Samuel Laynes kan Virac, Catanduanes, 10 barangay na an pigsusuplayan nin tubig kan lokal na gobyerno huli sa kawaran na nin mapagkukuwaan nin suplay makalihis na maghubas na an mga gripo dara kan matinding init nin panahon.
Huli digdi haros aru-aldaw ng naglilibot an fire truck kan Municipal Disaster Risk Reduction Management Office ngani na matawanan nin tubig an mga residentes.
Nagbabakal man nin mineral water na pigdidistribuir sa mga apektadong residentes ngani na igwa man nin maiinom.
Segun kay Laynes, nakikipagtabangan na ngunyan an lokal na gobyerno sa mga kongresista ngani na makapagpatugdok nin water system na dakula an maitatabang ngani na masuplayan an mga barangay lalo na an mga nasa hararayo asin bulod na lugar.
Pangapudan na sana kan alkalde sa mga residentes na magtipid na muna nin tubig ngunyan na igwa pang El Niño.
