Ipigpa-disbar ni acting Davao City Mayor Baste Duterte an pirang haralangkaw na opisyal kan nacion na sinda Department of Justice Secretary Jesus Crispin ‘Boying’ Remulla, Defense Sec. Gibo Teodoro, Justice Usec. Felix Ty, asin Prosecutor General Richard Anthony Fadullon.
Bilang legal counsel kan nasabing alkalde, personal na isinunad ni Atty. Israelito Torreon sa Kataas-taasang Hukuman an disbarment complaint kontra sa mga nabanggit na opisyal.
Segun sa nasabing abogado, an pagsunad nin disbarment case an basado sa kapasidad kan alkalde bilang kabahagi kan pamilya Duterte.
Mantang nagsayumang iheras ni Atty.Torreon an laog kan dokumento, segun saiya na katakod ini sa nangyaring pag-arestar asin pagpapadara ki former President Rodrigo Roa Duterte pasiring sa The Hague, Netherlands.
Huli kaini, ipigkonsidera sana ni Department of Justice Sec. Jesus Crispin ‘Boying’ Remulla an nasabing disbarment complaint bilang ‘forum shopping’, kun saen piglalaoman na niya ini urog na sa lado kan mga Duterte.
Saiya pang sinabi na bako ini an kaenot-enoting nakaresibe siya nin reklamo o kaso gikan sa nasabing abogado.
