LEGAZPI CITY – Nagpatanid an Task Force Kaayusan, Kalikasan, Kalinisan at Negosyo sa massive clearing operations na ipigsasagibo sa ciudad kan Legazpi sa obhetong mahali an mga nakaulang sa tinampo asin matanos na bulos kan trapiko.
Klinarificar ni Task Force head Andy Marbella sa intrevista kan Bombo Radyo Legazpi na ginibo na an esfuersos kan mga nakalihis pang taon asin antes pa ibaba an DILG Order No. 2019-121.
Napundo lang nin diit kan mawaran nin service vehicle alagad balik-trabaho ngonian kan matawanan nin truck hali sa city government.
Matoninong man suboot an mga pigsasagibong operasyon na puon sa pag-impormar sa publiko sa mga designado asin ipinagbabawal na lugar para sa parking.
Pigreresolberan naman an problema sa gubot na trapiko asin suboot ‘eyesore’ sa likod kan merkado kun sain tatawanan an mga negosyante nin 10 minutos sana sa pag-unload kan mga karga.
En kaso man magsobra sa oras, pwede nang i-tow kan mga personahes kan Public Safety Office (PSO).
Alagad sa mga natawanan na nin limang beses na warning, ipigduon ni Marbella an mahigot na pagpapaotob kan ordinansa.
Kasabay man sa patanid magin an mga kagsadiri nin motorcycle shops na warang tamang parking na nakakaulang na sa sidewalks na para kuta sa pedestrian.
Mientras tanto ngonian na aldaw, nagsagibo nin clearing operations an team sa parte kan Lakandula Drive.
