LEGAZPI CITY – Pighayag kan sarong weather specialist na malalaoman na an mas magayon na panahon sa mga masunod na aldaw makalihis an pangrarapado ni Bagyong Ada.
Segun ki Jaime Bordales sa intrevista kan Bombo Radyo Legazpi na basado kaya ini sa mga pigpapaluwas kan manlain-laing weather models na padiit-diit nang nagrarayo sa kadagaan kan Pilipinas an naunambitang raot nin panahon.
Nanotaran man ninda an pagsadit kan diyametro sa mga masunod na oras na senyales suboot na nagluluya na ini sagkod sa mababa ini sa tropical depression category asin pwedesir malusaw enkaso dae na ini makaluwas sa Philippine Area of responsibility.
Alagad paglilinaw niya na makakamate pa man liwat an dakulang parte kan Kabikolan nin mapanganuron na panahon huli sa trough kan naunambitang bagyo.
Pigtaram pa kan opisyal na enkaso makamate pa man nin pag-uuran an pirang lugar sa ibong kan warang bagyo o bako aktibo an shearline, pwedesir na huli ini sa localized thunderstorm na makawsa nin pagbabaha asin pagrasay nin daga.
Pagirumdom man ni Bordales na permihan sanang mag-antabay sa mga update asin advisories kan mga state weather bureau mapadapit sa kamugtakan kan satuyang panahon asin magsunod sa mga lakdang kan mga lokal na gobierno.
