Nagkaigwa nin pagbaba nin 7.8 porsiyento an numero kan mga Pilipino na nagpakasal kan 2023 o 414,213 na kasal sana an nairehistro kan Philippine Statistics Authority (PSA) kun ikukumpara sa mga nagpakasal kan 2022.
Susog sa PSA, pigpahiling kaini an paglipat kan mga Pilipino sa cohabitation kaysa pormal na kasal, kun saen 19 porsyento kan mga babaeng may edad 15 sagkod 49-anyos an nakaistar na kaiba an saindang partner, segun sa 2022 National Demographic and Health Survey.
Inireport man kan PSA na mas dakol man an ipinangaki na aki gikan sa dae kasal na nag-abot sa 842,728 kumpara sa 605,794 na gikan sa mga mag-agom na legal na kasal.
Pinakadakol man an nagpakasal sa bulan kan Pebrero, sinundan kan Disyembre asin Hunyo.
Nangenot an CALABARZON sa numero kan pinakadakol na nagpakasal, mantang an Bangsamoro Autonomous Region in Muslim Mindanao (BARMM) an may pinakahababa.
An civil weddings an nasa 42.9%, Roman Catholic na 31.4 porsiyento asin iba pang relihiyosong seremonya na may 23.5 porsiyento.
Nagtetenir an kalimitang edad kan pagpapakasal kan babae an nasa edad 28-anyos mantang 30-anyos sa mga lalaki.
Nagpapadagos man liwat an insidente nin amay na pagpapakasal kun saen may 12,630 babaeng menor-de-edad an nagpakasal kan 2023.
