Pigsierto kan Office of the Ombudsman na madali na sindang magsangat nin kaso kontra sa mga inapod na ‘master plunderers’ kan mga maanomalyang flood control projects.
Ini mismo an pighiras ni Assistant Ombudsman Atty. Mico Clavano sa press conference kan tanod-bayan manungod sa mga pighahanda na kaso na may kinaaraman sa korapsyon.
Madali nang isangat suboot o isakat sa magkakanigong korte an kaso laban sa mga inapod na ‘master plunderers’ sa flood control anomaly.
Segun kay Ombudsman Spokesperson Atty. Mico Clavano, an duwang ‘master plunderers’ na nasambit iyo an dating speaker kan Kamara de Representantes asin dating Presidente kan Senado.
Afuera kan duwang halangkaw na dating lideres kan duwang kongreso, nagkapirang mga senador asin kongresista an mahahampang man sa kaso.
Sa ibong kan pig-anunsyo na madali na nindang singilon an mga ini, nagsayuma si Assistant Ombudsman Clavano na ihiras an eksaktong petsa.
Pig-eksplikar kaini na mawot kan tanod-bayan na masyerto na dai sinda mabubugkos sa pig-anunsyo na petsa nganing madeterminaran an gabat kan kaso na isasangat sa korte.
Kun babalikan, mismong si Ombudsman Jesus Crispin ‘Boying’ Remulla an enot na nag-anunsyo kan pagsangat kan kaso.
Partikular niyang sinambit na masangat nin kaso an tanod-bayan laban ki former House Speaker Martin Romualdez asin former Senate President Chiz Escudero.
Naghahanda na suboot an Office of the Ombudsman na magsangat nin kasong plunder sa korte kontra sa duwang nasambit na dating lideres kan kongreso.
Mantang idinagdag ni Ombudsman Remulla na dakol pang ibang kaso an maluwas ngonian na Abril asin sa masunod na bulan kan Mayo.
