LEGAZPI CITY — Dae na nakapalag sa kamot kan mga otoridad an tulong lalaki makalihis na madakupan nin drum-drum na petrolyo na iligal na ibiniyahe pasiring sa Barangay Cantil, Balud, Masbate.
Sa ipinaabot na impormasyon kan mga otoridad sa Bombo Radyo, nagsasagibo nin sea borne patrol operation an Special Operations Unit (SOU) asin Balud Municipal Police kan manotaran an kaduda-dudang motorboat na may markang “Jumel” kun kaya pinagilid ini kan mga otoridad.
Sa saindang pag-imbestigar sa nasambitan na behikulong-pandagat, nadiskubre an 22 plastic drum na may laog na petrolyo na pigkakarkulong aaubuton nin P170, 000 an kabilugang kantidad.
Dae nin naipahiling na magkakanigong dokumento sinda Roger Alboro, Alvin Alboro asin Randy Bolante na mga residente kan Barangay Naro sa banwaan kan Cawayan na magpapatotoo kan legalidad kan proseso kan nasambitan na transportasyon.
Klarong pagbalgar sa Presidential Decree 1865 o “An Act Defining And Penalizing Certain Prohibited Acts Inimical To The Public Interests And National Security Involving Petroleum And/Or Petroleum Products, Prescribing Penalties Therefore And For Other Purposes” kabale na an short-selling asin adulteration of petroleum and petroleum products an kasong posibleng kahampangon kan mga ini.
Nakikipagtabangan na man an mga otoridad sa may tagsadiri kan behikulo na napag-araman na si Lito Alboro.
Sa ngunyan, nasa irarom na man kan pag-ataman kan nasambitan na pulisya an mga suspek siring man an nakulimbat na bagay na gagamiton bilang ebidensya sa pagsangat nin kaso kontra sa mga ini.
