LEGAZPI CITY – Nagsagibo nin aerial survey an lokal na gobierno kan Guinobatan kasunod kan mga serye nin pagbaha sa Barangay Masarawag.
Segun ki Mayor Ann Gemma Ongjoco sa intrevista kan Bombo Radyo Legazpi na pighiling ninda an mga quarry site, pig-aagihan kan tubig asin lahar nganing magibuhan nin assessment asin maadalan antes matawan nin lakdang kan national government mantang nakatalaan man sindang makipag-olay sa Mines and Geosciences Bureau Bicol asin Department of Public Works and Higways.
Naghagad man siya nin panahon sa saiyang mga nasasakupan nganing magibuhan nin sulusyon an mga nangyaring pagbaha huli ta aminado siya na dae man tulos ini ma-aaksyunan kan lokal na gobierno asin kaipuhan nang maghagad nin tabang sa ibang magkakanigong ahensya.
Pigtaram pa kan opisyal na nagsurat sinda sa Tactical Operations Group 5 para sa pagpapagamit sainda kan chopper na ginamit sa pag-aerial survey.
Sa presente an ipigdoon ni Ongjoco na mantang wara pa nin konkretong plano sa kun ano an ibubugtak sa may pamitisan kan Bulkang Mayon nganing maibitaran an pagbabaha sa saindang banwaan, magsunod na muna sa sainda enkaso magpa-otob sinda nin pre-emptive evacuation.
