LEGAZPI CITY – Pighihiling kan opisyal sa Barangay Oro Site syudad kan Legazpi na madali nang maideklarar na drug-cleared an saindang lugar.
Segun ki Kagawad Eliza Cas, nahihiling ninda sa saindang monitoring na nagpupurundo naman an mga naiimbwelto sa droga sa saindang iligal na aktibidad.
Tigkakaolay kaya suboot ninda an mga nagsurender na dae na liwat na magbalik sa pagdo-droga asin magbagong buhay na.
Ngane makatabang, pigpaplano kan barangay na magkaigwa nin livelihood projects asin iba pang mapagkakakitaan ngane duman na sana mapokus an saindang atensyon.
Alagad sa ngunyan, wara pa suboot sinda na budget para digdi.
Naisumite naman kan opisyal sa Departement of Interior and Local Government (DILG) Bicol an mga pangaran kan mga imbwelto pa sa droga.
Mientrastanto, dakula man an naging katabangan kan pagkakaigwa nin drainage system sa barangay kan Oro Site huli sa nabawasan na an pagbabaha tuyong mauran.
Dugang ni Cas, pigbabaha pa man an saindang lugar alagad madali na sana mahali an tubig bakong siring kan dati.
Sa ngunyan, plano nindang dugangan an drainage system urog na sa Purok 1 asin ipapadagos man an napundong paggibo nin drainage system sa parte kan Purok 3 kan barangay.
