LEGAZPI CITY- Nahihiling kan sarong health reform advocate na bako magayon para sa futuro kan medisina sa nacion an nagigin kapabayaan kan gobierno sa sektor kan salud.
Segun ki Dr. Tony Leachon sa intrevista kan Bombo Radyo Legazpi na magsasapar an healthcare system kan Pilipinas huli ta wara ng mga doktor an gugustuhon na magtrabaho sa nacion huli sa hibabang bayad.
Aminado man opisyal na padagos an paghahali kan mga health care workers asin nurses sa saindang propesyon huli sa bako bastanteng mga benepisyo na nakukuwa.
Idugang pa digdi an dae pagtatao nin government subsidy sa Philippine Health Insurance Corporation na pinaglalaoman na dakulang epekto para sa mga namamanwaan.
Mientras tanto, nagtutubod si Leachon na an dae pagtatao nin pondo sa Philhealth an igwa man na dakulang epekto sa administrasyon ni Presidente Ferdinand Marcos Jr.
Kaibanan sa mga ini an posibleng pagkadaog kan administration slate sa midterm elections huli sa salang mga desisyon sa paggamit kan pondo.
Huli digdi, kinakaipuhan suboot na pag-adalan nin marhay kan presidente an 2025 national budget ngani na maitama pa an gabos.
