Mahigot na pinahimutikan ni Batangas 1st District Rep. Leandro Legarda Leviste an alegasyon na iligal niyang nakuwa an inapod na “Cabral files” hale sa Department of Public Works and Highways (DPWH).
Sa sarong pahayag, sinabi ni Leviste na kan Setyembre 4 lehitimo asin suboot sa pagtugot ni DPWH Secretary Vince Dizon nakuwa niya an mga dokumento.
Ginibo kan mambabatas an paglilinaw kasunod kan pagluwas kan CCTV footage na mahihiling si Leviste na nagbisita sa opisina ni dating DPWH Undersecretary Maria Catalina Cabral.
Alagad pinahimutikan ni Sec. Dizon an pahayag na siya an nagtao nin permiso.
Enot kaini, inakusaran si Leviste kan sarong staff kan DPWH na iligal na nagkuwa asin nagkopya nin mga dokumento, bagay na pinahimutikan kan kongresista.
Segun ki Bicol Saro Party-list Rep. Terry Ridon, posibleng magserbing basehan an insidente sa ethics case laban ki Leviste.
Sa ibong kaini, nanindugan si Leviste asin nangapudan na tutukan an imbestigasyon sa suboot korapsyon sa DPWH.
Mientrastanto, nagpapadagos man an imbestigasyon kan mga otoridad dapit sa pagkagadan ni Cabral na binawian nin buhay kan Disyembre 18 makalihis na mahulog sa bangin sa Tuba, Benguet.
.){kind=link}