LEGAZPI CITY- Nagtaong commitment an Legazpi City Task Force Kaayusan sa pagtabang sa gobierno provincial kan Albay ngani na mamantenir an kalinigan sa Peñaranda park.
Ini an kasunod kan mga reports na kadakol na mga nagpapasyar sa nasabing parke an ipigwawalat sana an saindang mga basura.
Segun ki Legazpi City Task Force Kaayusan head Andy Marbella sa intrevista kan Bombo Radyo Legazpi na nakapag hakot na sinda nin dakol na mga basura sa lugar.
Kaibanan sa mga ini an mga basura nin fast food, mga plastic asin manlain lain na klase nin kalat na ipigwawalat sana kan mga namamanwaan.
Katakod kaini, nangapudan an opisyal sa publiko na gamiton an mga basurahan na ipiglaag sa nasabing parke asin ugalion an pag-segregate nin basura.
Paliwanag ni Marbella na dapat na gibuhon na prayoridad an pagmamantenir kan kalinigan ngani na magin magayon man an pagtetenir sa Peñaranda park na pigdadayo ngunyan kan mga tawo.
