LEGAZPI CITY—Padagos an pagpatrolya asin flood monitoring kan Legazpi City Police Station sa ciudad kan Legazpi para maabisuhan an publiko lalo an mga nagbabiyahe pa-Legazpi, para dae sinda maistorbo sa saindang biyahe.

Segun ki Police Executive Master Sergeant Carlos Paña, an tagapagtaram kan Legazpi CPS, sa intrevista kan Bombo Radyo Legazpi, nakipagkoordinar man an saindang opisina sa mga barangay officials para mas maparikas an pagtao nin impormasyon sa mga naga-biyahe palaog o paluwas sa ciudad.

Sinabi kaini na bako sana an trapiko an pigtutukan kan saindang mga otoridad kundi pati na an mga flood asin landslide-prone areas.

Dugang kan opisyal na sa presente passable na an gabos na tinampo sa ciudad, afuera sa parte kan barangay Buraguis kun saen nagkaigwa nin diit na pagrasay nin daga.

Pigsierto man kan saindang opisina na may kalamidad man o wara, padagos an saindang monitoring para maasigurar an kaligtasan kan publiko.

RELATED ARTICLESMORE FROM AUTHOR