LEGAZPI CITY—Nadukayan an sarong lalaking omboy na wara nang buhay sa basurahan sa Barangay San Vicente, Tabaco City.
Segun ki Tabaco City Police Station Public Information Officer Police Staff Sergeant Elaine Adriano, sa intrevista kan Bombo Radyo Legazpi, basado sa saindang inisyal na impormasyon sarong personahes kan Central Material Recovery Facility an nakakua kan omboy mantang nagse-segregate nin basura sa nasabing pasilidad.
Sa ngunyan nagpadara na nin imbestigador an mga kapulisan sa lugar nganing magkundusir nin ocular inspection asin nakipagkoordinar na sa City Health Unit nganing ma-examine an omboy.
Nakipagkoordinar na man an Tabaco CPS sa Tabaco City Environment and Natural Resources Office para sa backtracking kan truck asin kun saen gikan na barangay an mga basura.
Basado sa eksaminasyon kan City Health Unit na sarong bagong mundag an nasabing omboy na dae pa napuputol an umbilical cord asin pigkarkulo na nasa 2-3 aldaw nang wara nin buhay.
Dugang ni Adriano na padagos an imbestigasyon kan mga kapulisan mapadapit sa insidente.
Kinua na an hawak kan omboy durante kan eksaminasyon kan City Health Unit asin inilubong na sa pampublikong sementeryo.
Pangapudan kan opisyal sa publiko urog na sa mga magurang—na kun dae kaya an responsibilidad sa pag-aki pwedesir na maghagad nin tabang sa gobierno mapadapit sa saindang mga problema imbes na ibugtak an mga ini sa mga alanganing sitwasyon.
