LEGAZPI CITY—Sarong lalaki an gadan makalihis na maaksidente sa Barangay Agos sa banwaan kan Polangui, Albay.
Segun ki Police Lieutenant Colonel Jorge Meneses III, an acting chief of police kan Polangui Municipal Police Station, sa intrevista kan Bombo Radyo Legazpi, nangyari an aksidente sa may kahalabaan kan Maharlika Highway kan nakalihis na aldaw kun saen imbuwelto an limang lunadan.
Sinabi kan opisyal na an nakaaksidente pasiring sa Tabaco, asin susog man sa mga nakahiling nagin marikas an pagpapadalagan kan nasambitang lunadan asin posibleng nawaran nin kontrol rason para makarambola kaini an apat pang lunadan na pasiring sa Naga.
Dugang pa digdi, napuruhan an sarong motorsiklo na imbuwelto na may lunad na lalaki kun saen tulos man na idinara sa ospital alagad dae na ini naisalbar pa.
Pigkakarkulong nasa 14 katawo man na sakay an naimbuwelto sa karambola asin dinara sa ospital para sa asistensyang medikal.
Sa ngunyan pighahalat pa kan saindang opisina an pamilya kan biktima kun masangat ini nin kaso laban sa nakaaksidente.
Preparado man suboot an Polangui MPS sa pagproseso kan mga kinakaipuhang dokumento.
Mientrastanto, padagos man an pinagsasagibong imbestigasyon sa nasambitang aksidente.
