LEGAZPI CITY – Karsel an bagsak kan sarong lalaki makalihis na pagsasaksakon an saiyang tiyuhon sa Barangay Poblacion, Rapu-Rapu, Albay.
Segun ki Rapu-Rapu Municipal Police Station Chief of Police Police Major Joseph Melitante sa intrevista kan Bombo Radyo Legazpi na nag-ugat an pananaksak makalihis na mahiling kan suspetsado na binistong si alyas “Jo” an saiyang live-in partner na nasa laog kan harong kan biktima na binistong si alyas “Ramon”.
Basado sa saindang imbestigasyon an napag-araman na makikiinom man sana dapat nin tubig an suspetsado sa harong kan biktima alagad nahiling kaini an tsinelas kan saiyang live-in partner asin dae naghaloy an nahiling niya ini na nagtatago sa sarong kwarto.
Sa salaysay man kan suspek an naenot an biktima na saksakon siya kan kutsilyo na piggagamit kaini sa pagtadtad nin sibulyas alagad kan naagaw niya ini an iyo na man suboot an ginamit niya sa pananaksak sa saiyang tiyuhon.
Pigtaram pa kan opisyal na marikas na nagpasiring an iridong biktima sa Rapu-Rapu District Hospital nganing magpabulong alagad dae naghaloy an inilipat sa Sorsogon Provincial Hospital huli sa sinapo kaini na lugad sa walang-daghan.
Sa presente an nakakulong na an suspetsado sa saindang hepatura asin pighahalat an statement kan biktima nganing makapagsunad sinda nin kaso kun sain pwedesir ining mahampang sa kasong frustrated homicide.
Pagirumdom ni Melitante sa mga nakahiling kan insidente na dae magduwang isip na makipagtabangan sainda sa paagi kan pagtatao nin statement nganing makadugang sa mga impormasyon sa pigsasagibong imbestigasyon dapit sa insidente.
