LEGAZPI CITY—Liwat na iaaktibar kan Department of Public Works and Highways Bicol an saindang “Lakbay Alalay” Motorist Assistance Centers nganing maasigurar an ligtas na biyahe kan mga motorista ngonian na nagdadangadang na Semana Santa.
Segun ki Department of Public Works and Highways Bicol Public Information Officer, Lucy Castañeda, sa intrevista kan Bombo Radyo Legazpi, mapuon ini sa Miyerkules Santo, Abril 16, 2025, alas-otso nin pagkaaga, mantang matatapos ini sa Sabado, Abril 19, 2025 alas singko nin pagkahapon.
Sinabi kaini na an nasabing lakdang iyo an sa pakikipagkoordinasyon sa mga lokal na gobierno, Land Transportation Office, asin Philippine National Police.
Dugang kan opisyal na kalimitang maabot sa 25 mga Motorist Assistance Centers an saindang pigbubugtak sa bilog na rehiyon kan Bicol.
Sinabi kaini na 24 oras man na naka-deploy an saindang mga personahes sa mga binugtak na Motorist Assistance Centers ngani magtaong asistensya sa kun ano man na kinakaipuhan na tabang kan mga biyahero na pasiring sa Bicol.
