LEGAZPI CITY—Uminabot na sa labi 2,350 an mga na-stranded na pasahero sa mga pantalan sa Bicol kawsa kan huma kan bagyong Uwan.
Segun ki Philippine Ports Authority Bicol Media Relations Officer, Achilles Galindes, sa intrevista kan Bombo Radyo Legazpi, kadaklan digdi an gikan sa Matnog port; sinundan kan Pio Duran port; pantalan sa Castilla, Sorsogon; Tabaco port; asin pantalan kan Bulan, Sorsogon.
Mantang nasa 827 rolling cargoes man an stranded sa mga pantalan kan rehiyon kun saen pinakadakol an sa Matnog port; sunod sa Pio Duran port; pantalan sa Castilla asin Bulan sa Sorsogon.
Dugang ni Galindes na an kadaklan sa stranded na pasahero an nasa evacuation centers na.
Abiso man kan opisyal na mantinidong suspendido an mga biyahe sa pantalan huli kan bagyo siring man na magsunod sa mga abiso kan mga otoridad asin kun kinakaipuhan na mag-ebakwar an dapat na makipagkoordinar sa mga ahensya kan gobierno na pwedesir magtabang sainda.
