LEGAZPI CITY – Plano kan Department of Science and Technology Bicol na mai-deploy pasiring sa mga liblib na mga komunidad an saindang “Lab Move” mobile laboratory na nagtatabang na magtest kun malinig an saindang pig-iinom na tubig.
Segun ki DOST Bicol Regional Director Rommel Serrano sa intrevista kan Bombo Radyo Legazpi na naglalaom sinda na bago magtapos an presenteng taon an mapoon na an saindang deployment asin kaipuhan ninda na magkaigwa nin partnership sa mga user, Local Government Unit, asin ibang mga estudyante.
Huli ta an DOST Bicol an pinaka-enot sa nacion na nagkaigwa nin mobile laboratory an inabot nin P6.5M an kantidad sa pagbilog kan nasabing teknolohiya na madaling maihatod sa mga namamanwaan.
Saro man suboot ini sa ipigpresentar ninda kay DOST Secretary Renato Solidum sa inagurasyon kan saindang Innovation Hubs katakod kan 2025 Regional Science, Technology, and Innovation Week.
Target man kan opisyal na ideploy na sa mga komunidad an mobile laboratory sa maabot na Nobyembre asin magtao nin serbisyo sa saro sagkod duwang provincia kan Bicol.
Dapat man suboot na makipagtabangan man an mga educational institution, business partners asin mga Micro, Small, and Medium Enterprises (MSME’s) na ma-impormaran an mga residentes na yaon sa saindang lugar an nasabing mobile laboratory.
Pagdoon niya man na enkaso magin matrayumpo an paglansar kan “Lab Move” an bako imposible na madugangan ini nganing lalo pang magdakol an natatabangan kaini na mga komunidad.
Paglilinaw ni Serrano na siring kan saindang serbisyo para sa laboratory an piggagamitan man ninda nin mga chemical kun kaya mahagad man liwat sinda nin bayad alagad paliwanag niya man na para man sana an bayad sa maintenance kan mobile laboratory.
