LEGAZPI CITY – Kinontra ni Ako Bicol Party-list Representative Alfredo Garbin Jr. an ipighayag kan kapwa Bicolanong kongresista, Albay Representative Edcel Lagman na “parte kan script” kan mayorya an nagin lakdang kan nagkapirang miembro kan minorya sa pirilian sa House speakership.
Sa ekslusibong intrevista kan Bombo Radyo Legazpi ki Garbin, ipig-eksplikar kaining consensus kan minority block an pag-nominate ki Manila 6th District Rep. Bienvenido Abante Jr.
Nanindogan pa an kongresista na parte sinda kan totoong minority block urog na kun hihilingon an mga miembro na compuesto kan Makabayan bloc, anom na miembro kan Liberal Parte na kritikal sa mga orolay sa gobierno asin nagkapirang bago na hali sa party-list coalition.
Direkta man na sinabi kaining warang basehan an nagin komento kan beteranong lehislador.
Mientras tanto, bukas man an minority bloc asin iimbitaran pa suboot si Lagman kun mawot na maglaog sa minorya. En caso magsayuma si Lagman, magtetenir ini bilang parte kan independent bloc.
