LEGAZPI CITY- Nagbaba an numero kan mga lugar sa rehiyong Bicol na ipigkokunsiderar na areas of concern katakod kan paparaning pirilian.
Marurumduman na kaibanan sa mga red category an banwaan kan Baleno asin ciudad kan Masbate sa provincia kan Masbate.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na napagkauyunan ini basado sa balidasyon kan Armed Forces of the Philippines, Philippine National Police asin iba pang miyembro kan Joint Security Control Committee.
Paliwanag kan opisyal na an mga nakaibanan sa red category an igwang historya nin kadahasan asin presensya kan mga rebeldeng grupo.
Alagad posible pang ma-downgrade o maitaas an kategorya kan iba pang mga lugar, depende sa sitwasyon kaini sa bilog na durasyon kan election period.
