LEGAZPI CITY- Maogmang ipigheras kan Albay Police Provincial Office (PPO) na nagbaba na sa ngunyan an nairerehistrong kaso nin mga aksidente sa tinampo.
Base sa datos kan PNP, hale sa dating 2252 na traffict incident kan Enero hasta Agosto kan nakalihis na taon, nagbaba na ini sa 2103 na sana ngunyan taong 2019.
Sa intrevista kan Bombo Radyo Legazpi kay Pol. Capt. Dexter Panganiban an tagapagtaram kan Albay PPO, epekto suboot ini kan mas pinahigot na kampanya kan kapulisan, mga checkpoints asin mahigot na pagbabantay sa mga pampublikong tinampo.
Katakod kaini, nagsasagibo man an PNP katabang an Albay Public Safety and Emergency Management Office (APSEMO) nin seminar sa mga pulis na nakapwesto sa tinampo nganing mas maging epektibo sa pagmamando kan trapiko.
Nangapudan man an opisyal sa publiko na pirmehan na mag-ingat sa pagmamaneho asin magsunod sa mga pigpapaotob na regulasyon ngani na dae magkaproblema.
