Makusog na pinahimutikan kan kampo kan mga biktima an pahayag ni Atty. Salvador Panelo na nabasag na suboot an teorya kan prosekusyon sa hearing kan International Criminal Court laban ki dating Presidente Rodrigo Duterte.
Segun kay human rights lawyer Atty. Neri Colmenares, wara siyang nahihiling na indikasyon na “shattered” na an kaso.
Imbes suboot, orog pang napatibay an paninindugan na makusog an ebidensya kan prosekusyon asin maluya an sa depensa.
Pigtuyaw man niya an argumento na bako “widespread” an mga paggadan.
Tinawang-duon ni Colmenares na sa mga kasong crimes against humanity, dae kinakaipuhan an pormal na pag-oolay nganing patunayan na may common plan.
Dae suboot kapanu-panubod na an rinibong panggagadan resulta sana kan isolated asin random na aksyon kan mga pulis.
Tinuyaw man niya an paglaladawan kan depensa sa numero kan mga nagadan bilang “minimal,” na suboot makulog para sa pamilya kan mga biktima.
Mientrastanto, sinabi kan abogado ni Duterte na si Nicholas Kaufman na “bizarre” an alegasyon na naglansar nin mahiwas na pag-atake an dating presidente kontra sa populasyon.
Hinapot man kaini kun dapat man na imbestigaran si Presidente Ferdinand Marcos Jr., sa tahaw kan mga pahayag na nagpapadagos pa an mga vigilante killings maski natapos na an termino ni Duterte.
Nanindugan an kampo kan mga biktima na warang political motibasyon an kaso, asin an reklamong isinangat kan 2018, bago pa man magtukaw si Marcos, an bilang parte kan saindang paghanap nin hustisya.
