Juban, Sorsogon nakamate nin moderato sagkod sa magagabat na mga pag-uuran pirang oras antes an pagland-fall ni Tropical Storm “Ramil” sa provincia

LEGAZPI CITY – Nakamate nin moderato sagkod sa magagabat na mga pag-uuran an banwaan nin Juban, Sorsogon pirang oras antes an pagland-fall ni Tropical Storm “Ramil” sa banwaan kan Gubat kan kaparehong provincia.

Segun ki Juban Municipal Disaster Risk Reduction and Management Office Head Arvee Lodronio sa intrevista kan Bombo Radyo Legazpi na base sa saindang monitoring an wara man ki mga barangay an nakapagrehistro nin pagbabaha, pagrasay nin daga asin iba pa.

Wara man suboot na mga residentes an nakatenir sa mga evacuation center alagad ipigdoon niya na nakapreparar sana an mga ini enkaso kaipuhanon mag-ebakwar kan saindang mga nasasakupan.

Pigdoon niya man na pirang aldaw antes an pagrani sa kadagaan kan nasambitang bagyo an nagkaigwa na sinda nin pre-disaster risk assessment mantang nagpa-otob man an saindang lokal na gobierno nin mga ordinansa arug kan liquor ban asin no-sailing policy sa saindang municipal waters.

Pigtaram pa kan opisyal na nakipagkoordinar na man sinda sa mga opisyale kan mga barangay na komun na nakaka-eksperyensya nin pagbabaha na dae magduwang isip na magpa-otob nin pre-emptive evacuation enkaso maglala an sitwasyon.

Paghistorya niya pa na numero uno sa saindang pigpoproblema tuyong nagkakaigwa nin mga raot nin panahon iyo an pag-uuran huli ta an saindang banwaan an nagseserbing catch basin kan mga tubig na hale sa Mt. Bintacan asin Mt. Bulusan.

Piglinaw niya man na supisyente an supply kan mga relief goods na nakahandang ibarewas enkaso magkaigwa nin mga evacuees asin residentes na maapektaran.

Pagirumdom man ni Lodronio na kun wara man ki importanteng gigibuhon an dae na magporbar na magluwas sa saindang kaharongan asin dae magduwang isip na magdulok sainda enkaso kaipuhanon ninda nin tabang nganing tulos sindang makapagresponde.