LEGAZPI CITY — Naglalaom an Department of Health (DOH) na maipapautob na an Universal Health Care Law (UHC) sa nacion ngonian na taon.
Sa intrevista kan Bombo Radyo Legazpi ki Usec. Mario Villaverde kan Health Policy and Systems Development Team kan DOH central office, tinawan an ahensya asin an PhilHealth nin 180 dias tangarig pakarayon an implementing rules and regulation (IRR) kan ley.
Pighihiling na matatapos ini sa enot na semana kan Setyembre alagad segun ki Villaverde, mawot na kumpletuhon an IRR antes an nakatalaang petsa tangarig maipautob na an UHC.
Pag-eksplikar pa kan opisyal na nababanga sa duwang component an ley sa population-based asin individual-based health services.
Nilinaw man ni Villaverde na bako boot sabihon igwa ng PhilHealth an gabos, libre na an gabos na serbisyo.
Obheto suboot kan ley urog na sa financial coverage na mabawasan an pansadiring gastos kan mga namamanwa asin magkaigwa nin maray na paagi tangarig matawan kan benepisyo asin dae madificilan sa pag-access kan health services.
