LEGAZPI CITY-Kinumpirmar ni Department of the Interior and Local Government (DILG) Secretary Jonvic Remulla na nagpaluwas nin blue notice an International Criminal Police Organization (Interpol), na makakatabang sa pagdakop kay dating Ako Bicol Party List Representative Zaldy Co.
An blue notice na ipinaluwas may katuyuhan na makatipon nin dugang na impormasyon manungod sa pagkakakilanlan kan sarong indibidwal, sa saiyang kamugtakan o mga aktibidad na may kinaaraman sa nagpapadagos na criminal investigation.
Sa oras na maisyu an red notice, gagamiton man ini sa pagsubaybay sa lokasyon asin pagdakop sa sarong indibidwal na pighahanap o naserbihan nin sentensya.
Sa sarong press conference ngonian na aldaw nin Lunes, Nobyembre 24, hinapot man an kalihim kasunod kan ulat na posibleng nasa sarong nacion si Co na warang extradition treaty sa Pilipinas.
Sinabi man kan kalihim na posibleng may ibang pasaporte na kapot si Co sa saiyang pagbiyahe sa luwas kan nacion asin saindang pigbeberipika pa kun naggagamit ini nin ibang pangaran.
Sa ngonian an dai pa suboot natutukoy kun haen an eksaktong lokasyon kan dating kongresista.
Naenot na man na inisyuhan kan arrest warrant si Co kaiba an 17 kapareho niya akusado katakod kan maanomalyang flood control projects.
