Dinoble kan Kamara an itataong insentibo kay Pinoy Gymnast Carlos Yulo na nakasungkit nin duwang gold medals sa nagpapadagos na 2024 Paris Olympics.
Hali sa dating P3 milyon na insentibo, ginibo na ini ngunyan kan Kamara na P6 milyon.
Segun kay House Speaker Martin Romualdez, importanteng maipahiling kan gobyerno an suporta para sa mga atletang Pinoy na nagrerepresenta asin nagtatao nin honra para sa Pilipinas.
Kukuwaon an insentibo hali sa pinag-ambagan kan mga kongresista.
Sa lado kan Senado, inanunsyo kaini an planong pagtatao nin Senate Medal of Excellence kay Yulo alagad dae pa nin kumpirmasyon kung matao man nin insentibo.
An lokal na gobyerno kan Manila an naghahanda na para sa pagsasagibo nin Hero’s welcome kasabay an pagtatao man nin cash incentives.
Maging an pribadong korporasyon na naenot ng nagpromesa na matao nin condo unit sa Taguig na nagkakantidad nin P24 milyon, an nag-anunsyo na ia-upgrade na an incentives sa P35 milyon na condo unit na may tolong kwarto asin sadiring parking lot.
Apwera pa iyan sa P3 milyon na itataong cash kan nasabing korporasyon.
Pinaglalaoman man na matao an gobyerno nin insentibo kay Yulo basado sa ley kung sain nakalaag na P10 milyon an mareresibe kan mga gold medalist, P5 milyon sa silver asin P2 milyon sa bronze.
