Nasagip kan mga awtoridad an duwang menor de edad na babae sa Angeles City, Pampanga makalihis madiskubre na ipigpapabakal kan saindang ina an malalaswang ladawan asin video ninda online.
Susog sa report kan Philippine National Police – Women and Children Protection Center (PNP-WCPC), mismong an ina an nagkuwa kan mga sensitibong ladawan kan saiyang mga aki asin ipinabakal ini kapalit kan kantidad na ₱2,500 hasta ₱3,000 kada transaksyon.
Tulos isinagibo an rescue operation makalihis makatanggap nin report mapadapit sa suboot online sexual exploitation kan mga aki.
Sa paenot na imbestigasyon kan pulisya, nagluluwas na may kinaaraman suboot an ina sa sarong dayuhan na siya man daa nagturo kan paagi kun pano kukuwaan nin ganansya an paggibo asin pagpapabakal kan siring kaining klase nin content.
Segun kay PLT. COL. Armelina Manalo kan PNP-WCPC Luzon Field Unit, kadakol na kaso kan online exploitation sa mga aki an hale mismo sa mga magurang na naiimpluwensyahan o natutukduan kan mga banyagang karelasyon.
Nasa pangangataman na ngonian kan Department of Social Welfare and Development (DSWD) an duwang biktima, mantang padagos an pagtugis sa suspek.
Inasigurar ni PBGEN. Portia Manalad, hepe kan PNP-WCPC, na may kaakibat na psychological support an mga aking biktima nganing mabawasan an trauma.
Nangapodan man an pulisya sa publiko na tulos magsumbong sa mga otoridad kun may naaaraman o naka-eksperyensya nin anumang klase nin pang-aabuso.
