LEGAZPI CITY-Bumuo na ang International Criminal Court (ICC) ng Trial Chamber para sa kaso ni dating Pangulong Rodrigo Duterte.
Dahil dito, uusad na ang paglilitis mula Pre-Trial Chamber I matapos kumpirmahin ang three counts sa kasong crimes against humanity laban kay Duterte noong April 23.
Noong Abril 24, 2026, nagdesisyon ang Presidency na binubuo nina ICC President Tomoko Akane, First Vice President Rosario Salvatore Aitala, at Second Vice President Reine Alapini-Gansou, kung saan pinangalanan ang hukom upang bumuo ng Trial Chamber III:
Kinabibilangan ito ng sumusunod na mga Hukom: Judges Joanna Korner (United Kingdom), Keebong Paek (Republic of Korea), at Nicolas Guillou (France).
Ang ICC Presidency ay nagdesisyon upang pormal na ilipat ang hurisdiksiyon ng kaso ni Duterte sa Trial Chamber III para sa susunod na yugto ng paglilitis.
Matatandaan na noong nakaraang linggo ay inanunsyo ng ICC na kinumpirma “unanimously” ng pre-trial judges ang kasong crimes against humanity laban kay Duterte noong panahon ng kanyang kampanya kontra iligal na droga (November 1, 2011 hanggang March 16, 2019), noong siya ay nanunungkulan pa bilang Mayor ng Davao City at bilang Presidente.
