LEGAZPI CITY- Dae pa man pormal na nakakaresibe nin mga panibagong direktiba hale sa central office ng Department of Health (DOH), hinigotan na suboot kan regional office kaini sa Bicol an mga isinagibong lakdang tangarig mapugulan an padagos pang paglobo kan mga kaso kan tigdas.
Sa isinagibong press conference ngonian na aldaw kan DOH, napag-araman na pinalawig pa an deklarasyon kan measles outbreak sa Luzon kun sain kaibanan na an Bicol, magin sa Central asin Eastern Visayas.
Sa ekslusibong intrevista kan Bombo Radyo Legazpi ki DOH Bicol Director Dr. Ernie Vera, kan nakaaging taon pa nahiling an paglobo kan numero makalihis na magbadol sa 353 an kabilugan na kaso kaitong 2018.
Ngonian na taon, nag-abot naman sa 54 an measles cases hale Enero hasta Pebrero 2 sana.
Katakod kaini, pinahiro na an mga health units sa anom na provincia sa Bicol tangarig na magsagibo kan supplemental immunization kun sain an mga personahes na mismo kan ahensya an pagpasiring sa mga kaharungan tangarig na magbakuna.
Ipigduon pa ni Vera na warang dapat ipaghadit sa vaccine na pigagamit na sa siyam na taon asin kaipuhan nang aksyunan an problema antes pa man na dagos na magin “epidemic”.
