LEGAZPI CITY-Nagsagibo nin rally an mga miyembro kan “Duterte Panagutin Europe” asin iba pang grupo ngani ipangapudad an tuluyang pagkakakulong ni dating Presidente Rodrigo Duterte asin iba pa na suboot responsable sa mahiwasang panggagadan kan panahon kan madugong drug war.
Pinangenotan kan grupo an hiro-protesta sa luwas kan International Criminal court (ICC), bitbit an mga tarpaulin na igwang nakasurat na mga pangapudan.
Kabale digdi an pagpapanimbag kay Duterte para sa hustisya kan mga biktima asin pamilya kan madugong gera kontra droga.
Nagsagibo man nin halipot na programa an mga grupo kun sain saindang ipinagdoon na dae dapat nababalewala an direchos humanos kan kada namamanwaan.
Ngonian na aldaw, piglalaoman na magsasagibo liwat an nabanggit na grupo nin programa harani sa ICC headquarters bilang pagpapahiling nin suporta sa mga biktima kan suboot extrajudicial killings na nangyari sa nakalihis na administrasyon.
Nagkapira man sa mga pamilya kan mga biktima, naenot nang nag-biyahe ngani personal na mag-atendir sa pagdangog laban sa dating Presidente.
