LEGAZPI CITY – Suportado asin ikinaugma kan grupo nin mga paratukdo an duwang bill na ipigbubusol ni Senator Risa Hontiveros manungod sa pagdadagdag nin sahod asin benipisyo kan mga paratukdo.
Alagad segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na maski magayon an duwang propwestong bill an magtetenir na problema iyo an kun handa an gobierno na gibuhon na ley ini urog nang dae ninda nahihiling na para sa dagdag sahod asin benipisyo kan mga paratukdo an nakapalaog sa 2026 budget kan Department of Education.
Dae sinda malaom sa kun maski siisay man na senador o pulitiko huli ta may kaniya kaniya sindang interes kundi mas sasandigan ninda an saindang sabay-sabay na paghiro nganing madangog an saindang agrangay asin matawan nin magkakanigong sulusyon.
Narisa man ninda na kadiit asin bihira sana kan mga senador o kongresista an nagpapabor sa mga siring kaining propwesto huli ta mas pigtatawan nindang prayoridad an korapsyon asin utang panluwas.
Pigtaram pa kan opisyal na magpapadagos an saindang paghiro para sa dagdag sahod huli ta 50 pesos sana an dagdag sa saindang sweldo poon kan 2024 mantang padagos man na naghahalangkaw an presyo kan mga babarakalon.
Pangapodan ninda na gibuhong P50,000 an entry level o minimum na sahod kan mga paratukdo huli ta kun ikokompara sa presente nindang sahod an kulang para sainda urog na kun babawasan pa nin mga legal na buwis arug kan Philhealth asin iba pa.
Pagdoon niya man na kadaklan ngonian kan pulitiko an mapamate o mapahayag nin suporta sa mga paratukdo ngonian na world teachers month arug suboot ni Presidente Ferdinand Marcos Jr. na kadakol na ipigpromesa sa saiyang State of the Nation Address alagad kun pagbabasehan an 2026 budget an magkaiba an mga ini.
Pighayag pa ni Quetua na magsasagibo man sinda nin mga serye nin paghiro nganing ipadangog sa gobierno an saindang kamawotan na magpapagayun sa sitwasyon kan mga paratukdo sa enterong nacion.
