LEGAZPI CITY – Nagtutubod an Presidential Communications Operations Office (PCOO) na urog pang mapapakusog asin mapaparikas an nation-building kun igwa nin magayon na collaboration asin kooperasyon an gobierno asin pribadong media.
Sa intrevista kan Bombo Radyo Legazpi ki PCOO Secretary Martin Andanar, ipigbubusol suboot ngonian sa irarom kan administrasyon Duterte an Government-Media Bridge Policy, na ikatulo sa darakulang proyekto para sa mga nasa media puon kan pagkapasar kan Freedom of Information (FOI) asin pagkrear sa Presidential Task Force on Media Security (PTFOMS).
Katakod kaini, naglilibot suboot an opisyal sa mga provincia kan Pilipinas tangarig na matukar an general welfare asin problema kan mga nasa media na konektado sa linya kan trabaho.
Sa 22 na taon sa pagsiservicio sa media, aminado si Andanar na dakol pa suboot an isyu na dapat na kahampangon kan pinamamayuhang oficina partikular na sa isyu kan job security, housing, aspetong medikal asin iba pa.
Mientras tanto, kumpiyansa an opisyal na urog pang mapapangatamanan an mandato kan mga taga-media kun makikisumaro an mga ini sa kampanya sa pagtatarabangan.
