LEGAZPI CITY – Payo ni Albay Governor Al Francis Bichara sa mga estudyante asin commuters na ibitaran na muna an pagpasiring sa mga mall asin iba pang lugar hasta sa liwat na magpadagos an gabos na public transport system sa probinsya.
Katakod ini kan mahiwasan na transport strike o tigil pasada ngunyan na aldaw bilang protesta kan mga jeepney drivers kontra sa planong pag-phase out kan Land Transportation Office (LTO) sa mga behikulong lampas na sa 15 taon an edad.
Pig-aabisuhan man an publiko na mag-amay sa saindang byahe ngani na dae ma-stranded.
Sa ibong kaini, igwa nin mga i-oopresir na libreng sakay pasiring asin gikan sa Tiwi, Polangui asin Daraga to Legazpi para sa mga ma-stranded na pasahero.
Nakasakat man an direktiba sa gabos na ambulansya kan LGU asin Municipal Health Office na mag-standby asin maghanda sa pag-asister sa saindang mga areas of responsibility.
Mientrastanto, sinuspinder ni Legazpi City Mayor Noel Rosal an klase sa elementarya asin high school sa parehong pampubliko asin pribadong eskwelahan.
Suspendido man an klase sa Aquinas University, St. Agnes Academy, Legazpi Hope Christian School, Washington International School, asin Bicol University.
