LEGAZPI CITY – Ipigbuyagyag kan mga opisyales kan Barangay Imalnod, Legazpi City na mas lalong nagkawsa nin pagbabaha an ipigtugdok na flood control project sa saindang lugar.
Segun ki Kagawad Imelda Andes sa intrevista kan Bombo Radyo Legazpi na kulang sa tamang proseso asin bako maray an pagkakagibo kan proyekto.
Nag-ooverflow suboot an tubig sa tinampo maski diit sana an ipigbabagsak na uran na nagtatao man nin pahirap asin peligro sa mga residentes asin mga behikulo.
Paghistorya niya man na kun ikokompara na wara pa an nasabing flood control project kaysa sa ngonian an masasabi niyang mas madali dati na maghupa o magsubside an tubig baha huli sa dating mga nakatanom na kahoy sa palibot kan salog kompara ngonian na sementado na.
Pigtaram kan opisyal na sa magayon sana sa enot an proyekto alagad ngonian an perwisyo na asin problema an ipigtatao sa saiyang nasasakupan.
Mawot niya man na pakarayon an mga ipigtutugdok na mga proyekto sa saindang lugar asin dae pagtipidon sa mga materyales para sa kaligtasan kan mga residente.
Pangapodan ni Andes sa national government na ayuson asin dae pagsayangon an mga proyektong ipigtutugdok asin warang personalan huli sana sa pagsimbag ninda sa mga naglalatawan na issue asin problema sa mga flood control projects kan Gobierno.
