LEGAZPI CITY – Padiit diit nang namamatean sa banwaan kan Matnog sa provincia kan Sorsogon an epekto ni Severe Tropical Storm Opong.
Segun ki Matnog Municipal Disaster Risk Reduction and Management Officer Edgar Tumangan sa intrevista kan Bombo Radyo Legazpi na nakaka-eksperyensya na ngonian sinda nin pabugso-bugso na makusog na paros mantang kadiit sana an nairehistrong pag-uuran.
Pigheras niya man na kan nakalihis na duwang aldaw an puga-puga an saindang preparasyon asin monitoring urog na an kadaklan na mga nasasakupan ninda an nasa coastal barangays.
Mahigpit man an nagin kasuguan kan saindang alkalde na paghandaan asin ngonian an nahihiling ninda an magayon na resulta mantang uminabot na sa 2,000 na indibidwal an stranded sa Matnog Port asin padagos na naghahalangkaw.
Pigtaram pa kan opisyal na pigka-olay na man ninda an ibang stranded na pasahero na kaipuhan nindang magpasiring sa mga evacuation center na naka-ready para sa sainda asin handa man na magtao nin tabang an lokal na gobierno para sa saindang pangenot na pangangaipuhan ngonian.
Afuera sa mga stranded passengers an nakarehistro na man sinda nin 762 pamilya na katampad nin 2,775 na indibidwal mantang padagos man an pagbabarewas ninda nin pagkaon para sa mga evacuees.
May ibang evacuees man na nagbaralikan sa saindang kaharongan huli sa kadiit na uran na namamatean sa ibong kan wara pa sindang ipigtataong abiso sa saindang nasasakupan.
Nagpapasalamat man si Tumangan sa pakikipagtabangan kan publiko sa paagi kan pagsunod sa saindang mga lakdang nganing masyertong ligtas an saindang nasasakupan sa panahon kan kalamidad.
