Nakapagrehistro nin engkwentro an pwersa kan mga otoridad laban sa mga rebeldeng grupo sa parte kan Mobo, Masbate.
Sa intrevista kan Bombo Radyo Legazpi kay Maj. Frank Roldan, an DPAO chief kan 9th Infantry Division kan Philippine Army, nagdurar nin maabot sa 20 minutos an naging palitan nin putok kan mga otoridad kan 2nd infantry battalion kontra sa mga rebelde.
Makalihis an naging engkwentro ay tulos man na nagdulag sa magkakaksuway na lokasyon an mga rebelde.
Maabot sa 15 myembro nin NPA an nakalaban kan mga otoridad.
Nakapagkumpiskar man nin nagkapirang armas asin mga pampasabog na gamit kan mga rebelde.
Napag-araman na antes na mangyari an enkwentro ay igwang naresibe na report hale sa sarong residente an mga otoridad manungod sa presensya kan mga rebelde sa Mobo kaya tulos na nagsagibo nin operasyon an Phil. Army.
Padagos pa man na pinag-aaram kan mga otoridad kun igwang nakulugan sa lado kan mga rebelbe mantang dae man na nakulugan sa lado kan pwersa armada kan Pilipinas.
Mientras tanto nin huli sa sunod sunod na nairehistrong engkwentro sa Masbate ay mas lalong pinahigot an seguridad asin pagbabantay sa probinsya kontra sa presensya kan mga rebeldeng grupo.
Pangapudan man kan opisyal na padagos na makipagtarabangan an komunidad para sa dagos nang pagkapuho kan insuhensiya sa Masbate asin sa Bilog an rehiyon.
