LEGAZPI CITY – Pighahagad kan sarong election watchdog sa Commission on Elections na maggibo nin lakdang nganing masyerto an integridad asin transparency sa nagdadangadang na 2025 Midterm Election.
Segun ki Kontra Daya Convenor Danilo Arao sa intrevista kan Bombo Radyo Legazpi na naghagad ini nin despensa sa delay kan pasumite ninda huli ta nangalap pa sinda nin kadakol pang signatories kun sain uminabot sa 20 mga grupo an nagpirma sa letter.
Kompwesto kan manlain-laing election watchdog, IT expert asin iba pang indibidwal na nagmamawot nin malinig na eleksyon sa Mayo 12 an nagpirma sa saindang ipigtaong surat sa komisyon.
Pangapodan ninda na gibuhong mas transparent an isasagibong pirilian sa paagi kan saindang inirekomenda na manual counting bago an mismong actual transmission kan boto nganing magkaigwa nin check and balance.
Pigtaram pa kaini na importante an transparency sa pirilian kun kaya magayon kun dudugangan ang counter measure na gigibuhon arug kan manual na pagbibilang nganing maasigurar na nabibilang nin tama an mga boto.
Sa hiling niya man na makakaya kan komisyon sa laog nin sarong bulan na magpreparar sa manual tally huli ta kaipuhan sana sa manual na pagbibilang an manila paper asin ballpen.
Base man sa saindang na-eksperyensya, dae kalimitan na pigsisimbag kan komisyon an saindang pigpapadarang surat alagad naglalaom sinda na sisimbagon ini huli ta bako ini power tripping kundi simpleng pagdemand nin transparency asin accountability sa pirilian.
Pagtuga niya man na mapapabantol kaini an transmission kan resulta pero mas mapagal suboot kun marikas ini alagad dae man sigurado asin pano nin pagdududa sa ipapaluwas na resulta.
