LEGAZPI CITY- Arestado an duwang lalaki makalihis na makuwaan nin mga bako lisensyadong badil sa saindang harong sa Barangay Lungib, Pilar, Sorsogon.
Binisto an mga naarestar na sinda Joven Borabon, 27 anyos asin Jonalven Borabon 45 anyos.
Enot kaini, nakaresibe nin report an Pilar MPS manungod sa panunutok nin badil asin pananakot kan saro sa mga suspek na si Jonalven sa saiyang pinsan na si Gibert Borabon.
Huli digdi, kaiba an kapitan kan barangay binuman kan mga pulis an harong kan suspek alagad digdi na nahiling si Joven na may bitbit na sarong 12-gauge shotgun na may saro man na bala.
Sa pag-iinspeksyon pa kan mga pulis narekober pa an sarong unit nin caliber 22 rifle kaiba an 35 bala para digdi asin 13 pang bala para sa caliber 9mm.
Alagad kan hagadan na kan PNP nin mga dokumentos asin lisensya an duwa para sa mga nasabing badil,wara man ini nin naipahiling kung kaya inarestar na kan mga otoridad.
Sa ngunyan nakakarsel na an duwa na nahahampang sa kasong pagbayolar sa Acta republika numerado 10591 o an Comprehensive Firearms and Ammunition Regulation Act.
