LEGAZPI CITY-Nilinaw kan Department of Social Welfare and Development (DSWD) na maski an mga kabali sa middle class pwede pa man giraray mag-apply asin mag-resibe nin ayuda sa Assistance to Individuals in Crisis Situations (AICS).
Segun ki Program Director Edwin Morata sa sarong media forum, na an mga biglaang pangyayari arog kan kalamidad, helang, o iba pang emerhensya dae nagpapalaen sa pobre, mayaman, o middle class.
Tinawan-duon kaini na katuyuhan kan programa na matabangan an sisay man na nakakaeksperyensya nin dae piglalaoman na krisis asin dae tulos kayang masimbagan an saindang pangangaipo sa pinansyal.
Paliwanag kan DSWD na igwa nin tulong mayor na lakdang sa pag-apply kan AICS, iyo an pagpila, pag-assess, asin pag-interview bago maproseso asin maipaluwas an financial assistance.
Kabale sa mga pangenot na dokumento na kaipuhan, iyo an sarong valid ID, medical certificate, medical abstract, o certification hale sa doktor o mental health professional.
Nakadepende man sa pangangaipo kan aplikante, pwedisir na hagadon an ibang mga dokumento arog laboratory request, doctor’s order o treatment protocol na nakasurat na presyo, reseta para sa bulong, asin statement of account para sa mga babayadan sa ospital.
Segun sa ahensya, an AICS nakatalaga sa mga indibidwal o pamilya na nakakaeksperyensya nin biglaang krisis na dae ninda tulos mababayadan an mga gastos.
