LEGAZPI CITY-Tinawan doon ni Senador Sherwin Gatchalian an pangangaipo para sa sarong komprehensibong pag aayos kan Senado, orog na sa imahe kaini, kasunod kan serye nin mga kariribokan na nangyari sa mataas na kapulungan kan nakaaging semana.
Binanggit kan senador an mga video na nagkakalat sa Internet na nagin tema kan wala-tuong mga komentaryo asin katatawanan, kun sain an mga pangyayari sa Senado, ginibong mga “meme” asin sarong klase nin “drama.”
Dapat suboot na baguhon ini asin tawan nin atensyon kan presenteng liderato o kun sisay man, an masunod na mamumuno sa Senado.
Dugang pa ni Gatchalian, sa laog nin sampulong taon bilang senador, ini sana an pagkakataon na nakaeksperyensiya siya nin arog kaining sitwasyon.
Aminado siya na apektado an dignidad asin imahe kan senado huli kan kariribukan, rog na an nangyaring pambabadil sa laog kan edipisyo.
Sinabi niya na nagigin malinaw na ngonian an insidente nin pambabadil asin kaipuhan na ihayag an aktuwal na pangyayari, kaiba na an pagpapanimbag sa mga imbuelto.
Tinawan doon pa kaini na kaipuhan na masierto na dae na mautro an siring na insidente ngani na maprotehiran an imahe asin integridad kan senado.
Nagluwas an pangaran ni Gatchalian bilang saro sa mga pigkokonsiderar para sa pagkapresidente kan Senado.
huli sa saiyang kakayahan na magkasararo an nagkapirang miyembro kan majority bloc asin gabos na yaon sa minority bloc.
Nagpahayag man nin interes asin kumpiyansa an ibang mga senador sa kakayahan ni Gatchalian na mamuno sa kapulungan.
